22مئی بروز اتوار ، منہاج اسلامک سنٹر بارسلونامیں ماہانہ محفل گیارہویں شریف منعقد ہوئی جس میں اہل بارسلونا نے کثیر تعداد میں شرکت کی ، محفل کے مہمان خصوصی منہاج اسلامک سنٹر لندن کے ڈائریکٹر علامہ صادق قریشی (منہاجین الازہری) تھے ۔اس محفل کی خصوصیت یہ تھی کہ اس میں سرکارِ دوعالم ﷺ کے موئے مبارک کی زیارت کروائی جانی تھی جس کی وجہ سے شرکاء کی تعداد دیدنی تھی ۔
نمازِ عصر کے بعد محفل کا باقاعدہ آغاز تلاوت قرآن کریم سے حافظ محمد عابد نقشبندی نے کیا ،منہاج یوتھ لیگ کے محمد شفیق اور حافظ عاطف احتشام نے نعت رسول مقبول ﷺ پیش کرنے کی سعادت حاصل کی جبکہ نقابت کے فرائض نوید احمد اندلسی نے سر انجام دیئے ۔ علامہ صادق قریشی صاحب کو دعوت خطاب دی گئی جنہوں نے اپنی گفتگو میں قرآن و حدیث اور اقوالِ بزرگانِ دین کی روشنی میں حضور ﷺ کی برکات اور ان کے معجزات و کرامات بارے تفصیل سے بتایا، علامہ صاحب کے خطاب کے دوران منہاج اسلامک سنٹر تکبیر و رسالت کے نعروں سے گونجتا رہا ۔
نماز مغرب کی ادائیگی کے بعد علامہ صادق قریشی الازہری نے لندن سے لائے ہوئے موئے مبارک کے بارے تفصیل سے بتایا اور منہاج القرآن بارسلونا کے قائدین نے نہایت احترام سے موئے مبارک کو محفل میں لایا اور اس طرح اہل بارسلونا کو دیدار کی عظیم سعادت نصیب ہوئی۔ علامہ صاحب کی خصوصی ہدایت پر زیارت موئے مبارک کے دوران منہاج اسلامک سنٹر درود و سلام سے گونجتا رہا ۔دعا اور تقسیم تبر ک کے بعد محفل کا اختتام ہوا۔
