بارسلونا، سپین میں 19اگست 2012کو بارسلونا کو عید الفطر کا مرکزی اجتماع منہاج القرآن انٹرنیشنل سپین کے زیر اہتمام اسپورٹس ہال Ravalمیں منعقد ہوا جس میں ہزاروں افرا نے عید کی نماز اداء کی ، نمازیوں کی کثیر تعداد کی وجہ سے طے شدہ شیڈول کے مطابق 3جماعتیں کروائی گئیں ۔ اجتماع میں سوشلسٹ پارٹی کے رہنماء Jose Maria Salaنے بطور مہمان شرکت کی ۔منہاج یوتھ لیگ سپین کے نوجوانوں نے سیکورٹی اور انتظامات کی ذمہ داریاں سر انجام دیں ۔حسن کارکردگی اور خصوصی تعاون کرنے پر مختلف شخصیات کو اعزاز ی اسناد سے نوازا گیا ۔
نماز عید کی پہلی جماعت 8بجے حافظ محمد عابد، دوسری جماعت 8:45بجے حافظ محمد عمران اور تیسری جماعت 9:30بجے علامہ خان محمد چشتی کی اقتداء میں اداء کی گئی ۔ علمائے کرام نے نماز کی ادائیگی سے قبل حاضرین کو قرآن و حدیث کی روشنی میں رمضان المبارک، لیلۃ القدر، لیلۃ الجائزہ اور عید کے فضائل و احکامات کے بارے میں بھی بتایا ۔
اس پر مسرت موقع پر سوشلسٹ پارٹی کے رہنماء Jose Maria Salaنے بطور مہمان شرکت کی اورمسلمانانِ بارسلونا کو عید الفطر کی مبارک باد دی ، اُن کے ہمراہ سوشلسٹ پارٹی کی امیگریشن کمیٹی کے سیکریٹری حافظ عبد الرزاق صادق ،سوشلسٹ پارٹی کے Eernesto Carrionاور کاتالان فیڈریشن کے صدر طارق حفیظ عباسی بھی موجود تھے ۔ منہاج مصالحتی کونسل سپین کے صدر محمد اقبال چوہدری نے اتوار (چھٹی) کے دن کے باوجود صبح 8بجے مسلمانوں کے تہوار میں آمد پر اُن کا شکریہ اداء کیا جبکہ منہاج القرآن انٹرنیشنل سپین کی طرف سے نوید احمد اندلسی نے اُن کو گلدستہ پیش کیا ۔
سال 2012میں مالی معاملات میں منہاج القرآن بارسلونا سے خصوصی تعاون کرنے پر غلام قمر الدین، محمد انیس، عادل اختر اور محمد ناصر کو اعزاز ی اسناد پیش کی گئیں ، اسی طرح ماہ رمضان کے آخری عشرہ میں منہاج اسلامک سنٹر بارسلونا میں منعتکفین کی خدمت کرنے پر عادل تندوری ریسٹورنٹ کے ڈائریکٹر الحاج قاری عبد الرحمان کو اور ماہ رمضان میں منہاج القرآن بارسلونا کے لیے ٹرانسپورٹ کی سہولت فراہم کرنے پر چوہدری طارق مہدی گجر کو بھی اعزازی سند پیش کی گئی ۔
اسپورٹس ہال کے اندر انتظامی معاملات اور اسپورٹس ہال سے باہر سیکورٹی کی ذمہ داریاں منہاج یوتھ لیگ سپین کے نوجوانوں صدر یوتھ لیگ بلال یوسف کی قیادت میں احسن طریقے سے سر انجام دیں ، اس کے علاوہ منہاج القرآن بارسلونا کی طرف سے 2سیکورٹی گارڈ بھی کنٹریکٹ کیے گئے تھے ، ہال کے داخلی دروازے پر انتظامیہ کی طرف سے تمام نمازیوں کو جوتے رکھنے کے لیے شاپر دیے گئے تاکہ نماز کی ادائیگی کے بعد ان کو اپنے جوتے تلاش کرنے میں مشکل پیش نہ آئے اور اس طرح اگلی نماز کے لیے ہال جلد از جلد خالی ہو سکے ۔ اس دوران خرم شبیر قادری منہاج ٹی وی ٹیم کے ہمراہ اجتماع کی ویڈیو کوریج کرنے کے ساتھ ساتھ مختلف لوگوں کی آراء اور تبصرہ جات بھی لیتے رہے ۔ اس دوران نوید احمد اندلسی اور محمد اقبال چوہدری مائیک پر ہال کے اندر اور باہر نظم و ضبط قائم رکھنے کی درخواست بھی کرتے رہے ۔
