18دسمبر بروز ہفتہ منہاج القرآن انٹرنیشنل سپین بارسلونا کے وفد نے اہلیان طرطوسہ Tortosaکی خصوصی دعوت پر طرطوسہ شہر کا دورہ کیا، MQI Spainکے صدر مرزا محمد اکرم بیگ (صدر)کی قیادت میں جانے والے اس وفد میں حاجی زاہد اختر(نائب صدر)، علامہ عبد الرشید شریفی(امیر تحریک)، حاجی نذیر اداسی(ناظم اجتماعات)، نوید احمد اندلسی،(سیکریٹری جنرل) حاجی ارشد محمود(صدر مجلس شوریٰ) اور حافظ محمد عاطف (ممبر یوتھ لیگ)شامل تھے ۔ دورہ کی کوریج کے لیے انٹرنیٹ اخبار پاک نیوز کے چیف ایڈیٹر شفقت علی رضاء بھی وفد کے ہمراہ تھے ۔
استقبال اور میٹنگ
شام 5بجے طرطوسہ پہنچنے پر طرطوسہ مسجد کمیٹی کے چیئر مین غلام دستگیر بٹ ، معروف بزنس مین سلیم بھٹی اور ان کے دیگر ساتھیوں نے منہاج القرآن سپین کے قائدین کا پرتپاک استقبال کیا ۔نماز مغرب کی ادائیگی کے بعد میزبان تنظیم (طرطوسہ مسجد کمیٹی) کے عہدیداران کے ساتھ میٹنگ ہوئی جس میں کمیٹی کے چیئر مین غلام دستگیر بٹ نے طرطوسہ مسجد کمیٹی کے قیام سے اب تک کی روداد سنائی اور بتایا کہ ہم عرصہ دراز سے طرطوسہ میں پاکستانی کیمونٹی کے لیے ایک ایسا مرکز (مسجد) بنانے کی منصوبہ بندی کر رہے ہیں جو کہ ہماری آئندہ نسلوں کے دینی مستقبل کو محفوظ کرے اور اس مقصد کے حصول کے لیے اور سپین کے حالات کے پیش نظر طویل غور و حوض کے بعد ہم اس نتیجہ پر پہنچے ہیں کہ ہمیں کسی نظم کا حصہ بننا ہو گا، انہوں نے بتایا کہ میں ذاتی طور پر تحریک منہاج القرآن کے کام سے متاثر ہو ں اور یہی چاہتا ہوں کہ ہم منہاج القرآن کا حصہ بن جائیں تاہم اس سلسلے میں دیگر عہدیداران سے مشاورت جاری ہے اور چند ہفتوں تک فیصلہ کر لیا جائے گا۔ کمیٹی کے ممبران نے منہاج القرآن بارے مختلف سوالات کیے جن کے تفصیلی جوابات دیے گئے ۔
منہاج القرآن سپین کے محمد اکرم بیگ اور علامہ عبد الرشید شریفی نے منہاج القرآن بارسلونا اور منہاج القرآن بادالونا کے مراکز پر جاری مختلف تدریسی و سماجی سرگریوں کے بارے بتایا اورنوید احمد اندلسی نے منہاج القرآن انٹرنیشنل کی عالمی اور یورپین سطح پر جاری مختلف سرگرمیوں پر روشنی ڈالی۔اس موقع پر غلام دستگیر بٹ نے باقاعدہ طور پر منہاج القرآن انٹرنیشنل کی ممبر شپ لینے کا اعلان کیا ۔
محفل عاشوراء
طے شدہ شیڈول کے مطابق رات 8بجے نماز عشاء کے بعد مقامی مسجد میں شہادت امام حسینؓ کے حوالے سے محفل انعقاد پذیر ہوئی جس کا آغاز تلاوت قرآن کریم سے حافظ محمد عاطف احتشام نے کیااور نعت رسول مقبول ﷺ بھی پیش کی ،مقامی نوجوان محمد اشتیاق نے کلام میاں محمد بخش پیش کیا اور مقامی نوجوانون محمد ظہیر نے اطاعت الٰہی کے موضوع پر تقریر کی ۔
علامہ عبد الرشیدشریفی نے اپنے خطاب میں شہادت امام حسینؓ پر قرآن و حدیث کے حوالے سے تفصیلی روشنی ڈالی اور شہادت کی مختلف اقسام بیان کیں۔انہوں نے بتایا کہ دنیا میں 2مختلف سوچوں کے حامل گروہ موجود ہیں جن میں سے ایک کا خیال تو یہ ہے کہ "ٹھیک ہے میدان کربلا میں ظلم و زیادتی ہوئی لیکن اس واقعہ کو ہر سال بیان کرنے کا مقصد ہے" اور ان کا کہنا ہے کہ "اس کی بجائے اگر ہم شرعی علوم بیان کریں تو زیادہ اچھا ہے "اور دوسرا گروہ ایسا ہے جو واقعہ کربلا کو تو مانتا ہے لیکن وہ اس واقعہ تک محدود رہنے کی بجائے ابتدائے اسلام کی جلیل و القدر ہستیوں تک پہنچتے ہیں اور ان پر طعن و غیرہ کرتے ہیں ، انہوں نے قرآن و حدیث کے دلائل سے ثابت کیا کہ ان دونوں میں سے کوئی بھی انتہاء درست نہیں اور عقیدہ اہل سنت والجماعت ہی عقیدہ حقہ ہے ۔انہوں نے حاضرین محفل کو تحریک منہاج القرآن کے اغراض و مقاصد اور شیخ الاسلام ڈاکٹر محمد طاہر القادری کی امت مسلمہ کے لیے علمی خدمات کے بارے بھی بتایا اور اہل طرطوسہ کو تحریک منہاج القرآن میں شمولیت کی دعوت دی ۔انہوں نے بتایا کہ بعض لوگ ایسے ہیں جو صرف عشق کی بات کرتے ہیں اور دلائل کو فضول جانتے ہیں اوبعض صرف دلیل کے ساتھ بات کرنا پسند کرتے ہیں اور عشق کو نہیں مانتے اس کے برعکس منہاج القرآن انٹرنیشنل ایسی جگہ ہے جہاں عشق اور دلیل دونوں باتیں سکھائی جاتی ہیں ۔ علامہ عبد الرشید شریفی نے طرطوسہ مسجد کمیٹی کے چیئر مین غلام دستگیر بٹ کے باضابطہ طور پر منہاج القرآن انٹرنیشنل میں شامل ہونے کا اعلان بھی کیا ۔ 
درود و سلام اور خصوصی دعا سے محفل اختتام پذیر ہوئی جس کے بعد شرکاء میں طرطوسہ مسجد کمیٹی کی طرف سے لنگر تقسیم کیا گیا۔
وفد کے اعزاز میں عشائیہ
محفل کے بعدرات 11بجے غلام دستگیر بٹ نے اپنی رہائش گاہ پر منہاج القرآن کے وفد کے اعزاز میں عشائیہ دیا جس میں طرطوسہ مسجد کمیٹی کے دیگر عہدیداران نے بھی شرکت کی ۔ اس موقع پر مختلف موضوعات پر شیخ الاسلام ڈاکٹر محمد طاہر القادری کے خطابات سے حاصل کیے گئے ویڈیو کلپس بھی سنائے گئے، مسجد کمیٹی کے عہدیداران نے منہاج القرآن بارسلونا کے قائدین کی طرطوسہ آمد پر خصوصی شکریہ اداء کیا۔رات 1بجے قائدین طرطوسہ نے MQI Spainکوالوداع کیا ۔
